E so sind d Zwärgli entstande

Am 27. April 1984 händ 8 „Fasnachtsaagfraesseni“ d Guggenmuusig Gugge-Zwärgli 1984 grindet. Dr Sinn und Zwäg vo däm neye Verain sind näbe dr Geselligkait und dr Kameradschaft, au dailnaahm an dr Basler Fasnacht.

Mr schriiebe s Jòòr 1984. Gnauer gsait dr Fasnachtsdonnschtig dr 14. Mèèrze 1984. Im Restaurant Grotto (heisst hite Adagjo, isch aber wenigschtens immer no an dr Wäbergass), händ sich 8 Güggeler uss grueht, sprich si händ aine gnooh. E so gege di 2 am Moorge hett denne dr Guggemajor s Zaiche zeem Uffbruuch gääh. Das hett de besagte 8 aber gar nid passt, will me aifach uff dr Schnurre gsi isch. Ihri Guggekollege sind denne aber trotzallem em Major gfolgt und hän die 8 Naase deerte elai im Grotto looh hogge. Meeh hett denn deert aigendlig scho neyi Plän gschmiiedet, jo was meeh halt an dr Fasnacht e so macht, weme nimme mit em Major und em Räscht vo dr Wält nid e so ganz iiverstande isch. Ich meecht aber an däre Stell no vorrus schigge, dass bereits scho sit ainiger Zyyt, e weeneli diggi Luft in däre Gugge gsi isch.
 
Irgendwenn händ sich die 8 entschiiede, mir laufe richtig Grossbasel. Und jetzte kunnt s. In dr Rüdegass, bi dr ehemalige alte Hauptposcht, händ di 8 denne e glains Konzärtli gääh. Das isch d Entsteehig vom traditionelle Konzärt vo de Gugge-Zwärgli bi dr alte Hauptposcht gsi.

Es het denne doch no ainiges an Uffwand bruucht, bis die erschti Griendigsversammlig iiber d Biiehni gange isch. Aber, bereits 1985 hett meeh als „Guggemuusig Gugge-Zwärgli 1984“ an dr Basler Fasnacht dail gnooh.

 

Aber worum aigendlig Gugge-Zwärgli? 

Bim Gedangge als Zwärge-Gugge an dr Fasnacht mit z wirgge, isch dr Naame Gugge-Zwärgli entstande. 

Im Verlauf vom 1. Vereinsjòòr händ sich no ainigi Aggtivi zue däre neye Gugge gsellt und an dr Fasnacht 1985 isch me bereits mit 14 Aggtive und 12 Passive unterwäggs gsi. Do drmit isch dr Grundstei fyr di ney und spööter au erfolgriiechi Guggemuusig gelegt worde.

 

Dr Fredy Tanner und sini Mitstritter händ drno d Gschigg vom neye Verain langi Jòòr glänggt.
D Idee vo däne Aagfrässene isch gsi, dass me nid numme wieder e neye Gugge griiendet duet, sondern das vorallem au dr Plausch, Gselligkait und d Kollegschaft im Vordergrund stooht. Und genau däm Motto sind Zwärgli bis hütte treu bliiebe.
In all dänne Jòòre händ d Zwärgli e kontinuierliche Zuwaggs an Aggtiv -und Passivmitglieder erläbt. Wie bi jedere andere Guggemuusig händ au Zwärgli immer wiieder e baar Ruggschläg miesse hi nääh. Das hett aber drzue gfiiehrt, dass dr „harti Kärn“ in de letschte 10 Jòòr immer wiieder probiert hett, dr Abbwärtstrend uff z hebe. Das isch zeem Dail glunge, zeem Dail hämer au miesse mit numme 14 Aggtive Fasnacht mache.

 

Im Jòòr 2002 händ d Zwärgli di högschte Aggtiv -und Passivmitglieder kha. Nämlig 39 Aggtivi und 145 Passivi. 
D Philosophie vom Vereinsläbe, vom Muusigstil, sowie di neye und guete Kontaggt, wo in dr Zyyt zwüsche 2001-2007 knüpft worde sind, händ drzue gfiiehrt, dass Zwärgli iiberall in dr Stadt gärn gseheni Gäscht sind und au di entsprächende Aafrooge fyr Ufftritt händ nid lang miesse uff sich warte.
 
D Gugge-Zwärgli händ e Name und me kennt se als e zuverlässige und aaständige Partner und genau e so soll s au in de nägschte Jòòre bliiebe.